रोटरी क्लब अफ डिल्लीबजारले गर्यो विधार्थीका लागि शेयर बजार तालिम
काठमाडौको डिल्लीबजारमा रहेको डिल्लीबजार कन्या क्याम्पसका स्नातक तहमा अध्ययनरत छात्रा विद्यार्थीहरुका लागि रोटरी क्लब अफ डिल्लीबजारले शेयर बजार सम्बन्धि तिन दिने तालिम तथा अन्तर्कृया कार्यक्रम संचालन गरेको छ ।
कार्यक्रममा स्नातक तहमा अध्ययनरत ८० भन्दा बढी विधार्थीहरुको सहभागिता रहेको छ । कार्यक्रममा शेयर बजार, यसका फाइदा, जोखिम पहिचान, जोखिम न्यूनिकरण र संभावित लगानीका क्षेत्रहरुका सम्वन्धमा प्रशिक्षण तथा अन्तरक्रिया गरिएको छ । तालिम तथा अन्तरक्रिया कार्यक्रममा मुक्ति अर्याल, अर्जुन तिमिल्सिना, प्रेम ओलि र तथा रोटरी क्लब अफ डिल्लीबजारका अध्यक्ष सागरनिधि तिवारीको प्रशिक्षण रहेको छ ।
युवाहरुमा बढ्दो शेयर बजारप्रतिको रुचीलाई मध्यनजर गर्दै उनीहरुमा शेयर बजारका सम्वन्धमा अवधारणागत स्पष्टता, विद्यमान कानूनी व्यवस्था, शेयर बजारबाट लिन सकिने फाइदा र ख्याल गर्नुपर्ने कुराहरुका सम्वन्धमा विज्ञहरुबाट प्रशिक्षण दिइएको रोटरी क्लब अफ डिल्लीबजारका निवर्तमान अध्यक्ष इन्दिरा पराजुलीले बताउनु भयो । रोटरी क्लब अफ डिल्लीबजारले विभिन्न सामाजिक संघ, संस्था, कार्यालय, निकाय, सामुदायिक संस्था, विद्यालय, क्याम्पस लगायतका सरोकारवालाहरुसँगको समन्वय र सहकार्यतामा विभिन्न मानविय काम, समाज सेवा, सहयोग, शिक्षा र सशक्तिकरणका कामहरु विगत २५ वर्षदेखी गर्दै आईरहेको रोटरी क्लब अफ डिल्लीबजारकी सन्ध्या राजभण्डारीले बताउनु भयो ।
कार्यक्रममा बाेल्दै नेपाल इन्भेस्ट्मेन्ट एण्ड सेकुरिटिज ट्रेडिङ प्रा लिका प्रमुख कार्यकारी अधिकृत कृष्ण भण्डारीले " बचत भनेको खर्च पुर्व गरिएको लगानी हो, खर्च पछीको बचत लगानी पनि होइन र बचत पनि हुन सक्दैन । युवामा बचत र लगानीको सिप हुनु पर्दछ, सानो वचतबाट पनि धितोपत्र बजारमा लगानी गर्न सकिन्छ । प्रतिफल प्राप्त गर्न सकिन्छ । लगानीका लागी टन्नै पैसा हुनु पर्दैन" बताउनुभयो ।
कार्यक्रम नेपाल इन्भेस्ट्मेन्ट एण्ड सेकुरिटिज ट्रेडिङ प्रा. लि. (ब्रोकर नं १९) को सहयोगमा सम्पन्न भएको थियो ।
